मुंबईत रिपाइं आठवले गट लढणार ३८ जागा
मुंबई, ता. ३० : मुंबई महापालिका निवडणुकीत भाजपने सन्मानजनक जागा न दिल्यामुळे रामदास आठवलेंनी मुंबईतील ३८ जागांवर स्वबळावर लढण्याची घोषणा केली आहे. ‘रिपब्लिकन पक्षाच्या कार्यकर्त्यांमध्ये भाजपच्या भूमिकेमुळे प्रचंड संताप आहे. भाजप नेत्यांनी याकडे गांभीर्याने लक्ष देणे गरजेचे होते. आता आम्ही मुंबईत स्वबळावर लढू,’ असे आठवले यांनी सांगितले. आठवले यांच्या या निर्णयामुळे मुंबई महापालिकेत महायुतीच्या मतांच्या गणितावर परिणाम होण्याची शक्यता वर्तवण्यात येत आहे. रिपाइंच्या ३८ जागांमध्ये १२ जागा या दक्षिण मध्य मुंबईतील आहेत. यामध्ये चेंबूर, कुर्ला, वाशीनाका, धारावी आदी भागातील उमेदवारांना संधी देण्यात आली आहे.