रिपाइं-महायुतीची पाच जागांवर मैत्रीपूर्ण लढत

मुंबई, ता. ३१ : मुख्यमंत्री देवेंद्र फडणवीस यांची रिपब्लिकन पक्षाचे अध्यक्ष रामदास आठवले यांनी भेट घेतल्यानंतर महायुती व रिपब्लिकन पक्षात पाच जागांवर मैत्रीपूर्ण लढत होईल, असे आठवले यांनी जाहीर केले.
आठवले यांना २० ते २२ जागा हव्या होत्या; मात्र महायुतीच्या घोषणेत रिपब्लिकन पक्षाला जागा सोडण्यात आल्या नव्हत्या. त्यामुळे रिपब्लिकन पक्षाने ३० जागांवर अर्ज भरले. आठवले आणि प्रवीण दरेकर यांच्या चर्चेनंतर बुधवारी (ता. ३१) आठवले यांनी मुख्यमंत्र्यांची भेट घेऊन १७ जागांची अंतिम यादी फडणवीस यांना दिली. त्यातील १२ जागा रिपब्लिकन पक्षाला सोडण्यात येतील. तेथील महायुतीचे उमेदवार आपले उमेदवारी अर्ज मागे घेतील. भाजप व शिवसेना दोघेही रिपब्लिकन पक्षाला सहा-सहा जागा देतील. उरलेल्या पाच जागांवर मैत्रीपूर्ण लढत होईल. तसेच १९७ जागांवर रिपब्लिकन पक्ष महायुतीच्या उमेदवारांचा प्रचार करेल, असे आठवले यांनी सांगितले. त्याखेरीज रिपब्लिकन पक्षाला विधान परिषदेतील दोन जागा, महामंडळामध्ये ६० जागा, तर मुंबई महापालिकेत दोन स्वीकृत सदस्य देण्यात यावेत, अशी मागणीही आठवले यांच्या नेतृत्वाखालील शिष्टमंडळाने फडणवीस यांच्याकडे केली. फडणवीस यांच्याशी झालेल्या चर्चेनंतर रिपब्लिकन पक्षाचे समाधान झाले असून, मुंबई महापालिका जागावाटपातील आमची नाराजी दूर झाली आहे, अशी माहिती आठवले यांनी दिली.