संजय राऊत यांच्या
घराबाहेर धमकीचा संदेश
लहान मुलीचा चोर-पोलिस खेळताना प्रताप
मुंबई, ता. ३१ ः मुंबईसह राज्यात निवडणुकीची धामधूम सुरू असतानाच बुधवारी संध्याकाळी ठाकरे गटाचे नेते, खासदार संजय राऊत यांच्या भांडुप पूर्वेकडील निवासस्थानाबाहेर उभ्या असलेल्या वाहनावर बॉम्बस्फोटाच्या धमकीचा संदेश आढळला. याबाबत कळताच पोलिसांसह बॉम्बशोधक व नाशक पथकाने परिसराची झाडाझडती घेतली; मात्र कोणतीही संशयास्पद वस्तू आढळली नाही. अखेर पोलिसांनी सीसीटीव्ही चित्रण तपासले असता, एका लहान मुलीने खेळताना हा संदेश लिहिल्याचे स्पष्ट झाले.
कांजूरमार्ग परिसरात राहणारी मुलगी आपल्या पालकांसोबत राऊत यांच्या निवासस्थानाशेजारील वस्तीत राहणाऱ्या नातेवाइकांच्या घरी आली होती. ती आणि तिचे सवंगडी चोर-पोलिस खेळत होते. या खेळाचा एक भाग म्हणून या लहान मुलीने राऊत यांचा घराबाहेर कित्येक दिवसांपासून धूळखात उभ्या असलेल्या कारच्या काचेवर ‘सीएसटी में बॉम्ब ब्लास्ट होगा, आज रात १२ बजे बॉम्ब ब्लास्ट होगा’, असे लिहिले होते.
दरम्यान, या संदेशाबाबत राऊत यांचे बंधू, आमदार सुनील राऊत यांच्या माहिती पडताच, त्यांनी पोलिसांना कळवले. त्यानुसार कांजुरमार्ग पोलिस घटनास्थळी दाखल झाले. त्यांनी बॉम्बशोधक-नाशक पथकाला बोलावून कारसह राऊत यांच्या निवासस्थानाची तपासणी केली. त्यात कोणतीही संशयास्पद वस्तू आढळली नाही. अखेर पोलिसांनी राऊत यांच्या निवासस्थानी लागलेले सीसीटीव्ही चित्रण पाहिले. तेव्हा त्यात लहान मुलीचा हा प्रताप उघड झाला.
---
मुलीला प्रेमाने समज
तपासणीसाठी आलेल्या पोलिस पथकाने या मुलीच्या पालकांना बोलावले. तसेच पोलिस महिलेने या मुलीकडे चौकशी केली तेव्हा तिने हा संदेश खेळाचा भाग म्हणून लिहिल्याचे सांगितले. पोलिसांनी या मुलीचा भविष्यात असे न करण्याबाबत प्रेमाने समजूत घातली.