राहुल नार्वेकर यांनी विरोधी उमेदवारांना धमकावले!
ठाकरे गटाचा आरोप

सकाळ वृत्तसेवा
मुंबई, ता. १ : मुंबई महापालिकेच्या निवडणुकीसाठी अर्ज भरण्याच्या शेवटच्या दिवशी विधानसभा अध्यक्ष राहुल नार्वेकर यांनी विरोधी उमेदवारांना धमकावले आणि फॉर्म भरू दिला नाही, असा आरोप शिवसेना (ठाकरे) गटाकडून केला जात आहे.
शिवसेना (ठाकरे) पक्षाचे नेते संजय राऊत म्हणाले, ‘‘तो आरोप नाही तर सत्य आहे. मुळात राहुल नार्वेकर हे विसरले की ते विधानसभेचे अध्यक्ष आहेत. असे संकेत आहेत की ते नियम, संविधान आणि कायद्याचे अभ्यासक आहेत. त्यांनी शक्यतो अशा राजकीय कार्यक्रमांमध्ये सहभागी व्हायचे नसते, ते निष्पक्ष असतात; पण मी पाहिले की ते आपल्या गळ्यामध्ये कमळाबाईचे उपरणे टाकून त्यांच्या घरातील उमेदवारांचे अर्ज भरायला गेले. म्हणजे राजकीय पक्षाच्या कार्यक्रमात ते गेले. महाराष्ट्राचे विधानसभा अध्यक्ष विरोधी उमेदवारांना धमक्या देतात, प्रशासनावर दबाव आणतात. या राज्यात काय चाललेय, हे विचारायचीच सोय नाही. पूर्वी आम्ही विचारायचो कुठे नेऊन ठेवलाय महाराष्ट्र? आता महाराष्ट्र राहिलेलाच नाही; ठेवायचा प्रश्न येतोय कुठे? विधानसभा अध्यक्ष राजकारणात सक्रिय झाले आहेत. यापूर्वी मी असे कधी पाहिले नव्हते.’’
...
चूक तुमची आहे ः नार्वेकर
‘‘निवडणूक कार्यालयात सायंकाळी ५ वाजता जेवढे उमेदवार उपस्थित होते, त्यांना आत घेतले गेले. जे वेळेत आले नाहीत त्यांना अर्ज भरता आले नाहीत. त्यात भाजपच्याही काही उमेदवारांना अर्ज भरता आला नाही. २१२ प्रभागातील आमच्या उमेदवारालाही अर्ज भरता आला नाही. ज्यांना रडीचा डाव खेळायचा आहे, ते अशी कारणे देत असतात. ज्यांच्याकडे शेवटपर्यंत उमेदवार नव्हते, ज्यांनी १-२ वाजता उमेदवारांना एबी फॉर्म दिलेत, ते सायंकाळी ५ पर्यंत कसे अर्ज भरू शकतात? चूक तुमची आहे. तुम्ही वेळेत त्यांना उमेदवारी दिली असती, तर कदाचित त्यांना उमेदवारी अर्ज भरता आले असते,’’ असे राहुल नार्वेकर म्हणाले.