भाजप कार्यालयातून
एबी फॉर्मची चोरी
मुंबई, ता. ३ : दादर येथील भारतीय जनता पक्षाच्या वसंत स्मृती कार्यालयातून अध्यक्ष अमित साटम यांची सही असलेला एबी फॉर्म चोरी झाल्याने खळबळ उडाली आहे. या प्रकरणात भाजपने हा फॉर्म देऊ केलेल्या शिल्पा केळुसकर यांच्याविरोधात शीव पोलिसांनी शनिवारी गुन्हा नोंदवून तो तपासासाठी भोईवाडा पोलिसांकडे वर्ग केला आहे. वसंत स्मृती कार्यालयाचे सचिव दिनेश जगताप यांच्या तक्रारीआधारे पोलिसांनी ही कारवाई केली. त्यांच्या तक्रारीनुसार प्रतीक्षानगर येथील प्रभाग क्रमांक १७३ मधील फॉर्म कार्यालयातून चोरी झाला.

जगताप यांच्या तक्रारीनुसार या प्रभागातून भाजपच्या वतीने शिल्पा केळुसकर यांना २९ डिसेंबरला हा फॉर्म देऊन त्यांची उमेदवारी जाहीर करण्यात आली. महायुतीच्या बैठकीत ही जागा शिवसेनेला सुटली. तेथून पूजा कांबळे यांना उमेदवारी देण्याचा निर्णय झाला. त्यामुळे केळुसकर यांना दिलेला फॉर्म पक्षाने परत मागितला. २९ डिसेंबरच्या सायंकाळी त्यांनी फॉर्म परत केला. तो कार्यालयातील कपाटात ठेवण्यात आला; मात्र ३१ डिसेंबरला दुपारी २ वाजण्याच्या सुमारास कांबळे यांच्या पतीने केळुसकर यांनी भाजपच्या एबी फॉर्मवर उमेदवारी अर्ज भरल्याची माहिती दिली. तपासणी केली तेव्हा कपाटामधील फॉर्म गायब असल्याचे जगताप यांना आढळले. त्यामुळे केळुसकर यांनीच फॉर्म चोरल्याचा दावा जगताप यांनी तक्रारीत केला, असे पोलिसांनी सांगितले.