स्थानक कर्मचाऱ्यांच्या तत्परतेमुळे सापडले दागिने
मुंबई, ता. १० : स्वारगेट ते दादर मार्गावरील शिवनेरी बसमधून प्रवास करताना प्रमिक्षा कोळपे यांच्या गळ्यातील दोन लाख रुपये किमतीचे सोन्याचे दागिने हरवले. प्रमिक्षा यांनी पुण्याहून मुंबईला शनिवारी (ता.१०) सायंकाळी ६. ३० वाजता घरी आल्यावर दागिने हरवल्याचे समजले; त्यानंतर अर्ध्या तासाने त्यांनी याबाबत एसटी महामंडळात चौकशी केली. दादर स्थानक प्रमुख संतोष शिंदे आणि वाहनमित्र भरत जाधव यांनी प्रवाशाची मदत करण्यासाठी त्वरित पावले उचलली. शिवनेरी व्यवस्थापनाशी संपर्क साधून बस परळ आगारात पोहोचल्यावर तपासण्याचे निर्देश दिले. आगारातील सफाई कर्मचाऱ्यांनी बसची कसून तपासणी केली असता दागिने सापडले. ते ताबडतोब दादर स्थानकाकडे परत पाठवण्यात आले आणि प्रमिक्षा यांच्याकडे सुपूर्द करण्यात आले. यावेळी कोळपे यांनी स्थानक कर्मचाऱ्यांचे आभार मानले आहेत.