खासदार सुप्रिया सुळेंचा मुंबईत प्रचार

मुंबई : पुण्यात अजित पवार गटासोबत युती असलेल्या राष्ट्रवादी शरद पवार गटाच्या नेत्या, खासदार सुप्रिया सुळे यांनी शनिवारी (ता. १०) मुंबईत स्वपक्षासह उद्धव ठाकरे गट आणि मनसे उमेदवारांचा प्रचार केला. मुंबईत शिवसेना (उद्धव ठाकरे गट), मनसे आणि राष्ट्रवादी काँग्रेस (शरद पवार गट) अशी आघाडी आहे. या आघाडीतर्फे राष्ट्रवादीने मुंबईत १० उमेदवार उभे केले होते; मात्र त्यातील दोन उमेदवारांचे अर्ज बाद झाल्याने आठच उमेदवार रिंगणात आहेत. खासदार सुळे या शनिवारी ईशान्य मुंबईतील एकमेव उमेदवार प्रा. मंजू जयस्वाल यांच्या प्रचारासाठी भांडुपमध्ये आल्या. जयस्वाल यांच्यासोबत त्यांनी भांडुपमधील मनसेच्या ज्योती राजभोज, ठाकरे गटाच्या राजुल पाटील यांच्याही प्रचार कार्यालयांना भेटी देत प्रचार केला. भांडुपव्यतिरिक्त सुळे यांनी मालाड, दिंडोशी, कुर्ला, चेंबूर येथील राष्ट्रवादीच्या उमेदवारांच्या प्रचार कार्यालयांना भेटी दिल्या.