मुंबईच्या डबेवाल्यांचा
‘आवाज’ महापालिकेत
सकाळ वृत्तसेवा
मुंबई, ता. १६ : मुंबईच्या डबेवाल्यांचा प्रतिनिधी पहिल्यांदा मुंबई महापालिकेत पाऊल ठेवणार आहे. डबेवाल्यांचा मुलगा असलेल्या मंगेश पांगारे यांनी प्रभाग क्रमांक चारमधून विजय मिळवला आहे. शिवसेनेचे उमेदवार म्हणून पांगारे यांनी १४ हजार मते मिळवून विजय संपादन केला आहे. मुंबई डबेवाल्यांचा प्रतिनिधी म्हणून पहिला नगरसेवक होण्याचा बहुमान त्यांनी मिळवला आहे. त्यांच्या विजयामुळे मुंबईच्या डबेवाल्यांमध्ये आनंदाचे वातावरण आहे.

पांगारे यांचा विजय हा प्रामाणिक श्रम, शिस्त, विश्वास आणि सामाजिक बांधिलकी यांचा विजय असल्याची प्रतिक्रिया डबेवाल्यांनी दिली आहे. दहिसरमधील रावळपाडा येथे राहणाऱ्या दत्ताराम पांगारे यांनी ४० वर्षे डबे पोहोचवण्याचे काम केले. बेताचीच परिस्थिती असलेल्या पांगारे यांचा मुलगा मंगेश पांगारे यांनी शिक्षण घेऊन नोकरी न करता वेगळी वाट चोखाळली. त्यांनी पतसंस्था तसेच व्यावसायिक सल्ला देण्याचा व्यवसाय उभारला. समाजसेवा करता करता काही वर्षांपासून ते राजकारणात सक्रिय झाले. त्यांनी पालिका निवडणुकीत दहिसरच्या रावळपाडा प्रभागातून शिवसेनेची उमेदवारी मिळवली. पहिल्या प्रयत्नातच त्यांना यश मिळाले आहे.
...
डबेवाल्यांचा आवाज आता थेट महापालिकेच्या सभागृहात पोहोचला आहे. ही आमच्यासाठी अत्यंत अभिमानाची बाब आहे.
- उल्हास मुके, अध्यक्ष, मुंबई डबेवाला संघटना