आज मध्य रेल्वेवर मेगा ब्लॉक

सकाळ वृत्तसेवा

मुंबई, ता. १७ : उपनगरी रेल्वे मार्गावरील रुळांची दुरुस्ती तसेच सिग्नल यंत्रणेतील तांत्रिकांसाठी रविवारी (ता. १८) रेल्वेच्या मध्य रेल्वेवर मेगाब्लॉक घेण्यात येणार आहे. मध्य रेल्वेचा सीएसएमटी- विद्याविहार अप आणि डाऊन धीम्या मार्ग, तर हार्बर मार्गावरील पनवेल ते वाशी अप आणि डाऊन मार्गावर ब्लॉक घेण्यात आलेला आहे, त्यामुळे रविवारी घराबाहेर पडणाऱ्या प्रवाशांचे मेगाहाल होणार आहेत.
मुख्य मार्गावर सीएसएमटी ते विद्याविहारदरम्यान सकाळी १०.५५ ते दुपारी ३.५५ या वेळेत अप-डाऊन धीम्या मार्गावर ब्लॉक राहील. या काळात धीम्या मार्गावरील लोकल सेवा जलद मार्गावर वळवण्यात येणार आहेत. तर हार्बर मार्गावर पनवेल ते वाशीदरम्यान सकाळी ११.०५ ते दुपारी ४.०५ या वेळेत ब्लॉक असून, अनेक लोकल सेवा रद्द करण्यात येतील. ट्रान्सहार्बर मार्गावरही पनवेल ते ठाणेदरम्यान काही सेवा रद्द करण्यात आल्या आहेत. ब्लॉकदरम्यान सीएसएमटी ते वाशी विशेष लोकल चालवण्यात येणार असून, ठाणे ते वाशी/नेरूळ आणि बेलापूर ते उरण मार्गावरील सेवा सुरू राहतील. प्रवाशांनी पर्यायी व्यवस्था वापरण्याचे आवाहन मध्य रेल्वेने केले आहे.