धारावीतील ५० विद्यार्थ्यांनी पाहिला डब्ल्यूपीएल सामना
डी. वाय. पाटील स्टेडियमवर प्रत्यक्ष उपस्थिती

सकाळ वृत्तसेवा
मुंबई, ता. २१ : धारावीतील सुमारे ५० शालेय विद्यार्थ्यांना आंतरराष्ट्रीय दर्जाच्या महिला क्रिकेटपटूंना प्रत्यक्ष मैदानावर खेळताना पाहण्याची संधी मिळाली. नवी मुंबईतील डी. वाय. पाटील स्टेडियमवर पार पडलेल्या गुजरात जायंट्स आणि रॉयल चॅलेंजर्स बंगळूर यांच्यातील महिला प्रीमियर लीग सामन्याला हे विद्यार्थी उपस्थित होते.
ही स्टेडियम भेट धारावी पुनर्विकास प्रकल्पांतर्गत गेल्या एक वर्षापासून राबविण्यात येत असलेल्या क्रीडाकेंद्रित उपक्रमांचा एक भाग आहे. याच पार्श्वभूमीवर गेल्या आठवड्यात गुजरात जायंट्स संघातील तीन खेळाडूंनी धारावीला भेट देऊन महिला क्रिकेटपटूंशी संवाद साधला होता. बहुतेक विद्यार्थ्यांसाठी व्यावसायिक क्रीडा सामना थेट पाहण्याचा आयुष्यातील हा पहिलाच अनुभव होता. प्रत्यक्ष मैदानावर खेळ पाहणे हा पूर्णपणे वेगळाच अनुभव आहे. एक दिवस मीही अशाच पातळीवर खेळू शकते, असे मला वाटते अशी प्रतिक्रिया विद्यार्थिनींची होती.

मेस्सीला पाहण्याची संधी

धारावीतील जवळपास ४०० विद्यार्थ्यांनी यापूर्वी एका बुद्धिबळ स्पर्धेत सहभाग घेतला होता. याशिवाय धारावीतील सहा होतकरू युवा फुटबॉलपटूंना भारत दौऱ्यावर आलेला जगप्रसिद्ध फुटबॉलपटू लिओनेल मेस्सीला प्रत्यक्ष पाहण्यासाठी वानखेडे स्टेडियमला नेण्यात आले होते.