मुंबई-ठाण्यात अवकाळी पाऊस
समुद्रातील बाष्पाचा परिणाम

सकाळ वृत्तसेवा
​मुंबई, ता. २७ : जानेवारी महिन्याच्या अखेरीस मुंबईकर थंडीचा आनंद घेत असतानाच आज सकाळी अचानक पावसाने हजेरी लावली. अरबी समुद्रावरून येणाऱ्या बाष्पयुक्त वाऱ्यांमुळे मुंबई आणि ठाणे जिल्ह्यात पावसाचे वातावरण निर्माण झाले असून, भारतीय हवामान विभागाने काही तासांसाठी या दोन्ही जिल्ह्यांत पावसाचा यलो अलर्ट जारी केला होता.
​​हवामानतज्ज्ञांच्या मते, अरबी समुद्रात निर्माण झालेली आर्द्रता आणि वाऱ्यांच्या बदललेल्या दिशेमुळे कोकण किनारपट्टीवर ढगांची दाटी झाली आहे. उत्तर भारतातून येणारे थंड वारे आणि समुद्रावरून येणारे बाष्पयुक्त वारे यांच्या संमिश्र परिणामामुळे हे स्थानिक पातळीवर पावसाचे ढग तयार झाले आहेत. यामुळेच भर हिवाळ्यात मुंबई आणि ठाण्यात पावसाच्या हलक्या सरी कोसळल्या. ​हवामान विभागाने सकाळी ७ वाजता इशारा देत, सकाळी १० वाजेपर्यंत पावसाचा जोर राहण्याची शक्यता वर्तवली होती, त्यानुसार काही भागांत पाऊस पडला. हा पाऊस जरी हलक्या स्वरूपाचा असला, तरी पुढे दुसऱ्या दिवसांपर्यंत आकाश पूर्णपणे ढगाळ राहील आणि काही ठिकाणी दृश्यमानता कमी होऊ शकते, असा अंदाज वर्तवण्यात आला आहे.
...
थंडीचा जोर ओसरणार?
अचानक आलेल्या या पावसामुळे सकाळी कामावर निघालेल्यांची धांदल उडाली. पावसामुळे रस्ते निसरडे झाले असून, दुचाकीस्वारांना खबरदारी घेण्याचे आवाहन करण्यात आले आहे. तसेच या अवकाळी पावसामुळे हवेतील आर्द्रता वाढून थंडीचा जोर ओसरण्याची शक्यताही वर्तवण्यात आली आहे.