कारच्या धडकेत जखमी वाहतूक पोलिसाचा मृत्यू

मुंबई : भरधाव कारने धडक दिल्याने कर्तव्यावर असलेल्या वाहतूक पोलिस दलातील अंमलदार सुशांत मोरे यांचा सोमवारी (ता. २) शीव येथील लोकमान्य टिळक रुग्णालयात उपचारांदरम्यान मृत्यू झाला. पोलिसांनी दिलेल्या माहितीनुसार हा अपघात २८ जानेवारी रोजी रे रोड येथे पूर्व मुक्त मार्गावर घडला. रे रोड रॅम्पजवळ असलेल्या वाहतूक चौकीजवळ मोरे कर्तव्य बजावत होते. तेव्हा एका भरधाव कारने त्यांना धडक दिली. या धडकेत मोरे गंभीर जखमी झाले होते, त्यांच्या चेहऱ्याला मार लागला होता. उपचारांसाठी त्यांना टिळक रुग्णालयात दाखल करण्यात आले होते.