पक्षबांधणीसाठी
मनसे मैदानात
​मुंबई, ता. ५ : राज्यातील स्थानिक स्वराज्य संस्था आणि महानगरपालिका निवडणुकीतील पराभवाचे शल्य बाजूला ठेवत मनसे अध्यक्ष राज ठाकरे यांनी पक्षबांधणीसाठी पुन्हा एकदा कंबर कसली आहे. ‘शिवतीर्थ’ निवासस्थानी आज मुंबईतील प्रमुख पदाधिकाऱ्यांची महत्त्वपूर्ण बैठक पार पडली. या वेळी सर्व विभागप्रमुख, उपविभागप्रमुख उपस्थित होते. ठाकरे यांनी या वेळी प्रत्येक विभागाचा वैयक्तिक आढावा घेतला. पक्षवाढीसाठी नेमकी कुठे कसर राहिली, याचे विश्लेषण केले. केवळ निवडणुकांपुरते मर्यादित न राहता, जनसामान्यांच्या प्रश्नांवर आक्रमकपणे मैदानात उतरा, असे निर्देश त्यांनी पदाधिकाऱ्यांना दिले.
​​मुंबईतील बैठकीनंतर राज ठाकरे टप्प्याटप्प्याने राज्यभरातील इतर जिल्ह्यांतील पदाधिकाऱ्यांनाही मुंबईत पाचारण करणार आहेत. राज्यातील एकूण राजकीय परिस्थिती आणि मनसेची ताकद वाढवण्यासाठी कोणत्या उपाययोजना कराव्या लागतील, याचा आराखडा तयार केला जाणार आहे.