थकीत करासाठी मालमत्तांचे ई-लिलाव
महापालिकेचा बडगा

सकाळ वृत्तसेवा
मुंबई, ता. १२ : मालमत्ता कर थकविणाऱ्या मोठ्या थकबाकीदारांविरोधात महापालिकेने कठोर पावले उचलली असून जप्ती व लिलाव कारवाईचा धडाका सुरू केला आहे. ४५५ कोटी ४८ लाख रुपयांचा थकीत कर वसूल करण्यासाठी महापालिकेने गुरुवारी (ता. १२) आठ मालमत्तांवर अटकावणीची कारवाई केली. यापैकी सहा मालमत्तांची ई-लिलाव प्रक्रिया प्रत्यक्ष सुरू करण्यात आली असून, दोन मालमत्ताधारकांना २१ दिवसांची अंतिम नोटीस बजावण्यात आली आहे.
​महापालिकेच्या करनिर्धारण व संकलन खात्याने आज ई, डी, एफ-दक्षिण, एच-पश्चिम, पी-उत्तर, पी-दक्षिण आणि आर-उत्तर या विभागांमधील थकबाकीदारांवर ही धडक कारवाई केली. यामध्ये हॉटेल, मोकळे भूखंड, औद्योगिक गाळे आणि व्यावसायिक कार्यालयांचा समावेश आहे. संबंधित मालमत्ताधारकांना वारंवार नोटिसा देऊनही त्यांनी प्रतिसाद न दिल्याने अखेर पालिका प्रशासनाने लिलावाचे पाऊल उचलले आहे. लिलाव प्रक्रियेत गोरेगाव पश्चिम येथील मेसर्स आमिर पार्क ॲण्ड ॲम्युझमेंटचे हॉटेल (२६८ कोटी १६ लाख), वांद्रे पश्चिम येथील दुकाने व कार्यालये (५१.४२ कोटी), दहिसर येथील निवासी भूखंड (३४.८१ कोटी), परळ येथील मोकळा भूखंड (३४.१४ कोटी), माझगाव येथील तेल गिरणी व गोदाम (२३.२० कोटी) आणि मालाड येथील व्यावसायिक शेड (९.२३ कोटी) यांचा समावेश आहे. फोर्ट परिसरातील सरदार सय्यदना ताहेर सैफुद्दीन साहेब यांच्या मालकीच्या दोन मालमत्तांना (रुग्णालय व व्यावसायिक गाळे) २१ दिवसांची मुदत देण्यात आली आहे. या मुदतीत सुमारे ३४ कोटी ५१ लाखांची थकबाकी न भरल्यास या मालमत्तांचाही लिलाव केला जाणार असल्याचे प्रशासनाने स्पष्ट केले आहे.
​...
कारवाई सुरूच राहणार!
महापालिकेने चालू आर्थिक वर्षासाठी सहा हजार २०० कोटी रुपयांचे कर संकलन उद्दिष्ट ठेवले आहे. १ एप्रिल २०२५ ते ४ फेब्रुवारी २०२६ या कालावधीत पाच हजार ४२६ कोटी ८१ लाख रुपयांची वसुली झाली आहे. उर्वरित उद्दिष्ट पूर्ण करण्यासाठी मार्चअखेरपर्यंत ही मोहीम अधिक तीव्र केली जाणार आहे.​ ‘आर्थिक क्षमता असूनही जाणीवपूर्वक करभरणा टाळणाऱ्यांविरुद्ध मुंबई महापालिका अधिनियमातील कलम २०३ ते २०६नुसार जप्ती व लिलावाची कठोर कारवाई सुरूच राहील,’ असा इशारा अतिरिक्त महापालिका आयुक्त (शहर) डॉ. अश्विनी जोशी यांनी दिला आहे.