म्हाडाच्या पुणे मंडळातर्फे मार्चमध्ये तीन हजार घरांची लॉटरी
घराच्या प्रतीक्षेत असलेल्या सर्वसामन्यांसाठी मोठी संधी

सकाळ वृत्तसेवा
मुंबई, ता. २२ : म्हाडाच्या पुणे मंडळाअंतर्गत घरांना मोठी मागणी असून, नुकत्याच काढलेल्या चार हजार २०० घरांच्या लॉटरीसाठी दोन लाखांहून अधिक अर्ज आले होते. त्या पार्श्वभूमीवर म्हाडाकडून मार्चमध्ये पुणे मंडळामधील तीन हजार घरांची लॉटरी काढली जाणार आहे. त्यामुळे म्हाडाच्या घरासाठी लॉटरीच्या प्रतीक्षेत असलेल्या सर्वसामान्यांना मोठी संधी उपलब्ध होणार आहे.
म्हाडाचा विभागीय घटक पुणे गृहनिर्माण व क्षेत्रविकास मंडळातर्फे पुणे, पिंपरी-चिंचवड महापालिका व पीएमआरडीएसह सोलापूर, कोल्हापूर व सांगली या जिल्ह्यांतील विविध गृहनिर्माण प्रकल्पांतील ४,१८६ सदनिकांच्या विक्रीसाठी नुकतीच लॉटरी काढण्यात आली आहे. त्याला सर्वसामान्यांकडून मोठा प्रतिसाद मिळाला असून, दोन लाखांहून अधिक अर्ज आले होते. त्याची दखल घेत म्हाडाने पुन्हा उपलब्ध होणाऱ्या जवळपास तीन हजार घरांची लॉटरी काढण्याचे नियोजन केले आहे. त्यानुसार मार्चमध्ये लॉटरीची जाहिरात काढली जाणार असल्याची माहिती म्हाडाच्या अधिकाऱ्यांनी दिली.

काम प्रगतिपथावर
- शिरूर येथे ५७४ सदनिका व खराबवाडी येथे १९४ व्यापारी गाळे बांधण्याचे काम प्रगतिपथावर आहे.
- ताथवडे येथील फेज-१ प्रकल्प यशस्वीरीत्या पूर्ण झाला आहे. त्यानुसार पुढील फेज-२मधील ८० टक्के काम पूर्ण होऊन लवकरच ७५० निवासी व अनिवासी गाळे सोडतीत समाविष्ट करण्यात येतील.
- २० टक्के सर्वसमावेशक योजनेतून काही घरे उपलब्ध होणार आहेत.