पोलिस ठाण्यात गोधळ घालणाऱ्या तरुणाविरोधात गुन्हा
मुंबई, ता. ३ ः पोलिस ठाण्यात गोंधळ घालत शासकीय कामात अडथळा निर्माण करणाऱ्या तरुणाविरोधात गुन्हा नोंदवण्यात आला. गौरव सिंग असे त्याचे नाव आहे. हा प्रकार १ मार्चला पहाटे घडला.
पोलिसांच्या माहितीनुसार गौरव व त्याची प्रेयसी खार परिसरातील एका बारमध्ये पार्टीसाठी गेले होते. तेथे त्यांच्यात वाद झाला. गौरवने प्रेयसीला शिवीगाळ व मारहाण केली. बार व्यवस्थापनाने मध्यस्थी करण्याचा प्रयत्न केला असता गौरवने त्यांनाही शिवीगाळ केली. त्यामुळे बार व्यवस्थापनाने सांताक्रूझ पोलिसांना मदतीसाठी बोलावले.
पोलिस ठाण्यात आणल्यानंतर प्रेयसीचा जबाब सुरू असताना गौरव अनियंत्रित झाला. तिला शिवीगाळ करू लागला. ठार मारण्याची धमकी देऊ लागला. तेव्हा मध्यस्थी करणाऱ्या पोलिसांनाही त्याने शिवीगाळ केली. पोलिस ठाण्यातील साधनसामग्रीची नासधूस केली.