शिक्षक भरतीच्या प्रलंबित प्रश्नांवर
१० मार्चला आझाद मैदानात उपोषण
मुंबई, ता. ८ : पवित्र पोर्टलद्वारे राबविण्यात येत असलेल्या शिक्षक भरती २०२५ संदर्भातील विविध प्रलंबित प्रश्न सोडविण्याच्या मागणीसाठी उपोषण करण्यात येणार असल्याचे शिवयुनिटी फाउंडेशनचे अध्यक्ष प्रा. बालुशा माने यांनी सांगितले. हे आंदोलन १० मार्चला सकाळी १० वाजता आझाद मैदान येथे करण्यात येणार असल्याची माहिती संस्थेच्या वतीने देण्यात आली. शिक्षक भरती प्रक्रियेतील विविध प्रश्नांबाबत उमेदवारांनी शासनाकडे वारंवार निवेदने दिली आहेत, मात्र अद्याप ठोस निर्णय घेण्यात आला नाही. तसेच शासनाकडून वेळोवेळी काढण्यात येणाऱ्या विविध आदेशांमुळे उमेदवारांमध्ये संभ्रम निर्माण होत असल्याचेही निवेदनात नमूद करण्यात आले आहे. शासनाकडे वारंवार पाठपुरावा करूनही ठोस उत्तर मिळत नसून, केवळ नवीन परिपत्रके काढली जात असल्याने नाइलाजास्तव उपोषणाचा मार्ग स्वीकारावा लागत असल्याचे मत प्रा. माने यांनी सांगितले.