प्रवेश परीक्षांच्या तारखा निश्चित

मुंबई, ता. १२ : राज्य सामाईक प्रवेश परीक्षा कक्षातर्फे २०२६ मध्ये घेतल्या जाणाऱ्या शैक्षणिक वर्ष २०२६-२७ साठी सीईटी कक्षाच्या उच्च शिक्षण विभागाच्या एलएलबी (तीनवर्षीय व पाचवर्षीय), बीएड (जनरल व स्पेशल) व बीएड (इएलसीटी), बिपीएड, एमएड, एमपीएड व बीएड+एमएड या सात अभ्यासक्रमांच्या प्रवेश परीक्षेच्या तारखा सीईटी कक्षाने निश्चित करून या प्रवेश परीक्षेच्या अंतिम तारखा जाहीर केल्या आहेत.
या सात अभ्यासक्रमांपैकी सहा प्रवेश परीक्षेची प्रवेश नोंदणी पूर्ण झाली आहे. यातील एलएलबी (पाचवर्षीय) या अभ्यासक्रमाच्या प्रवेश परीक्षेची नोंदणी १५ मार्च २०२६ पर्यंत सुरू आहे. २०२६ची पहिली सीईटी २४ मार्चपासून सुरू होत आहे. एमपीएड या अभ्यासक्रमाच्या प्रवेश परीक्षेपासून या वर्षीच्या सीईटी परीक्षेस प्रारंभ होत असून, १७ मेपर्यंत एकूण १७ सीईटी परीक्षा होत आहेत. विद्यार्थ्यांनी प्रवेश परीक्षेशी संबंधित अद्ययावत माहिती, प्रवेश पत्राची माहिती व सूचनांसाठी नियमितपणे राज्य सामाईक प्रवेश परीक्षा कक्षाच्या www.mahacet.org या अधिकृत संकेतस्थळाला वेळोवेळी भेट द्यावी, असे आवाहन सीईटी कक्षाने केले आहे.