पोलिस शिपायाची आत्महत्या
प्रेयसीच्या आई-वडिलांविरुद्ध गुन्हा

मुंबई, ता. १७ ः पोलिस दलात नुकतेच भरती झालेले पोलिस शिपाई भय्यासाहेब व्हावळे (३२) यांनी रविवारी (ता. १५) कलिना प्रशिक्षण केंद्रात गळफास घेऊन आत्महत्या केली. आत्महत्येपूर्वी लिहिलेल्या चिठ्ठीनुसार वाकोला पोलिसांनी प्रेयसीच्या आई-वडिलांविरोधात गुन्हा नोंदवला.
पोलिसांनी दिलेल्या माहितीनुसार, भय्यासाहेब मूळचे परभणीचे आहेत. नुकतेच ते पोलिस दलात चालक म्हणून भरती झाले होते. कलिना येथील प्रशिक्षण केंद्रात त्यांचे प्रशिक्षण सुरू होते. रविवारी (ता. १५) सकाळी ते प्रशिक्षण केंद्रात गळफास घेतलेल्या अवस्थेत आढळले. पोलिसांना त्यांच्या खिशात चिठ्ठी सापडली. त्यात त्यांनी जालना जिल्ह्यात राहणाऱ्या एका तरुणीवर दीड ते दोन वर्षांपासून प्रेमसंबंध होते; मात्र तिच्या पालकांना हे मान्य नव्हते. त्यांनी नोकरी घालवू, आपल्यासह पालकांना जीवे ठार मारण्याच्या वारंवार धमक्या दिल्याचे नमूद केले होते. त्याआधारे पोलिसांनी प्रेयसीच्या पालकांविरोधात आत्महत्येस प्रवृत्त केल्याचा गुन्हा नोंदवला.