सोमालियातील बालिकेला मुंबईत नवी दृष्टी
कॉर्निया प्रत्यारोपण टाळत दुर्मिळ आजारावर मात
सकाळ वृत्तसेवा
मुंबई, ता. १९ : केराटोकोनस या दुर्मिळ नेत्ररोगाने त्रस्त असलेल्या सोमालियातील ११ वर्षीय बालिकेवर मुंबईत यशस्वी उपचार करण्यात आले असून, तिची दृष्टी लक्षणीयरीत्या सुधारली आहे. विशेष म्हणजे कॉर्निया प्रत्यारोपण न करता अत्याधुनिक तंत्रज्ञानाच्या सहाय्याने हा उपचार करण्यात आला.
या बालिकेला गेल्या काही वर्षांपासून कमी दिसण्याची समस्या होती. एका डोळ्याचा चष्म्याचा नंबर १८ तर दुसऱ्याचा २२ असूनही दृष्टी सुधारत नव्हती. सोमालिया तसेच मुंबईतील विविध रुग्णालयांमध्ये उपचार करूनही समाधानकारक परिणाम न मिळाल्याने अखेर तिला मुंबईतील खासगी रुग्णालयात दाखल करण्यात आले. तपासणीनंतर तिला केराटोकोनस हा आजार असल्याचे स्पष्ट झाले.
डॉक्टरांनी बालिकेची स्थिती लक्षात घेऊन कॉर्निया प्रत्यारोपण टाळत कॉर्नियल अलोजेनिक इंट्रास्ट्रोमल रिंग सेगमेंट आणि कॉर्नियल क्रॉस-लिंकिंग या दोन आधुनिक तंत्रांचा वापर केला. या प्रक्रियेद्वारे कॉर्नियाचा आकार स्थिर ठेवून त्याला अधिक मजबूत करण्यात आले. यामुळे आजाराची प्रगती रोखता आली. या उपचारानंतर बालिकेच्या दृष्टीत लक्षणीय सुधार दिसून आला असून, ती पूर्वीपेक्षा स्पष्ट पाहू शकत आहे.
तज्ज्ञांच्या मते, केराटोकोनस हा असा आजार आहे ज्यामध्ये कॉर्निया हळूहळू पातळ होत शंकूसारखा आकार घेतो आणि त्यामुळे दृष्टी कमी होत जाते. वेळेवर उपचार न झाल्यास अनेकदा कॉर्निया प्रत्यारोपणाची गरज भासते. मात्र या प्रकरणात आधुनिक उपचारपद्धतींच्या सहाय्याने प्रत्यारोपणाची गरज टाळण्यात यश आल्याचे डॉक्टरांनी सांगितले.