आयआयटी मुंबईत ‘डीप-टेक प्री-समिट’ सुरू

मुंबई, ता. २१ ः आयआयटी मुंबईतील संकुलात आज भारत इनोव्हेट्स डीप-टेक प्री-समिटचे उद्‍घाटन भारत सरकारचे प्रधान वैज्ञानिक सल्लागार आणि पंतप्रधानांच्या विज्ञान, तंत्रज्ञान आणि नवोन्मेष सल्लागार समितीचे अध्यक्ष प्रा. अजय कुमार सूद यांच्या हस्ते करण्यात आले. या वेळी भारत सरकारचे वरिष्ठ अधिकारी उपस्थित होते. हा दोनदिवसीय कार्यक्रम आहे.
प्रा. अजय कुमार सूद यांनी आपल्या भाषणात भारताच्या तंत्रज्ञान नेतृत्वासाठी आणि जागतिक स्पर्धात्मकतेसाठी डीप-टेक नवोन्मेषाचे महत्त्व सांगितले. त्यांनी शालेय संस्थांचा, संशोधन परिस्थितिकी तंत्रांचा आणि स्टार्टअप्सचा उच्च तंत्रज्ञानाच्या क्षेत्रात योगदानावर जोर दिला. डॉ. विनीत जोशी यांनी आपल्या भाषणात भारत इनोव्हेट्स २०२६ योजनेला एक संपूर्ण सरकार उपक्रम म्हणून त्याचे महत्त्व विशद केले. डॉ. के. राधाकृष्णन यांनी उपस्थित इनोव्हेटर्स आणि संस्थापकांना आत्मविश्वासाने कार्य करण्याचे आवाहन केले. प्रा. अभय करंदीकर यांनी भारताच्या नवोन्मेष प्रवासावर विस्तृत दृष्टिकोन मांडला आणि भारताच्या तंत्रज्ञान क्षेत्रात केल्या जात असलेल्या निर्णायक धोरणात्मक पावलांची माहिती दिली. प्रा. शिरीष केदारे यांनी सांगितले, की या वेळी ३,०००पेक्षा जास्त स्टार्टअप्सच्या अर्जातून १३७ स्टार्टअप्सची निवड करण्यात आली आहे.