कंत्राटी वीज कामगार आक्रमक; एप्रिलमध्ये कामगार आयुक्त कार्यालयावर धडकणार
सकाळ वृत्तसेवा
मुंबई, ता. २२ : महावितरण, महानिर्मिती आणि महापारेषण या तिन्ही वीज कंपन्यांमध्ये कंत्राटी कामगार वर्षानुवर्षे तुटपुंज्या वेतनावर काम करत असून, त्यांना रोजगाराची कोणतीही सुरक्षा नाही. त्यामुळे ते सातत्याने कंत्राटदारांच्या दबावाखाली काम करावे लागत असल्याने ते आक्रमक झाले असून, कंत्राटी कामगारांना कायम करावे, राज्यात कंत्राटी कामगार पद्धत कायम स्वरूपात बंद करत कंत्राटदार-विरहित वयाच्या ६० वर्षापर्यंत रोजगारात सुरक्षेसाठी हरियाना पॅटर्नचा प्रस्ताव मंत्रिमंडळास समोर तातडीने आणण्यासाठी व अन्य प्रलंबित प्रश्नांसाठी १६ एप्रिल रोजी कंत्राटी कामगार वांद्रे पूर्व येथील कामगार आयुक्त कार्यालयावर धडक मोर्चा काढणार आहेत.
महाराष्ट्र वीज कंत्राटी कामगार संघाच्या नुकत्याच पार पडलेल्या अधिवेशनात कंत्राटी कामगारांसाठी निकराचा लढा देण्याचा निर्णय घेतला असल्याचे भारतीय मजदूर संघाचे प्रदेश अध्यक्ष ॲड. अनिल ढुमणे यांनी स्पष्ट केले आहे. कंत्राटी कामगारांना नियमित करावे या मागणीबरोबरच वीज उद्योगास स्वतंत्र वेतन श्रेणी लागू करावी. किमान वेतन नव्हे, तर जीवन वेतन द्यावे अशा मागण्या आहेत.