‘डेक्कन क्वीन’चा
आज रेल्वे महोत्सव

सीएसएमटी स्थानकात विशेष कार्यक्रम

सकाळ वृत्तसेवा
मुंबई, ता. २६ : मध्य रेल्वेच्या प्रतिष्ठित डेक्कन क्वीन एक्स्प्रेसचा रेल्वे महोत्सव शुक्रवारी (ता. २७) छत्रपती शिवाजी महाराज टर्मिनस (सीएसएमटी) येथे साजरा करण्यात येणार आहे. या ऐतिहासिक गाडीच्या गौरवशाली प्रवासाचा आढावा घेण्यासाठी विविध कार्यक्रमांचे आयोजन करण्यात आले आहे.

गाडी सुटण्याच्या एक तास आधी सायंकाळी ५.१० वाजता या महोत्सवाची सुरुवात होणार आहे. या वेळी ‘डेक्कन क्वीन’ फुलांनी सजवण्यात येणार असून तिच्या इतिहासावर आधारित दृकश्राव्य सादरीकरणही होणार आहे, अशी माहिती मध्य रेल्वेने दिली आहे. प्रवाशांच्या सोयीसाठी आणि गाडीचे ऐतिहासिक स्वरूप जपत तिचे नूतनीकरण करण्यात आले आहे. १ जून १९३० रोजी सुरू झालेली डेक्कन क्वीन ही मुंबई- पुणेदरम्यान धावणारी देशातील पहिली डिलक्स आणि सुपरफास्ट गाडी म्हणून ओळखली जाते.