मध्य रेल्वे मार्गांवर उद्या मेगाब्लॉक
सकाळ वृत्तसेवा
मुंबई, ता. २७ : उपनगरी रेल्वे मार्गावरील रुळांची दुरुस्ती तसेच सिग्नल यंत्रणेतील तांत्रिक कामांसाठी रविवारी (ता. २९) मध्य रेल्वेच्या मुख्य मार्गासह ट्रान्स हार्बर मार्गावर मेगाब्लॉक घेण्यात येणार आहे. यामध्ये माटुंगा ते मुलुंड अप आणि डाऊन धीम्या मार्गावर, तर ट्रान्स हार्बर मार्गावरील ठाणे ते वाशी, नेरूळ अप आणि डाऊन मार्गावर मेगाब्लॉक घेण्यात येणार आहे.
मध्य रेल्वे
कुठे : माटुंगा ते मुलुंड अप आणि डाऊन धीम्या मार्गावर
कधी : सकाळी १०.०५ ते दुपारी ३.५५ वाजेपर्यंत
परिणाम : ब्लॉकदरम्यान सीएसएमटी येथून सुटणाऱ्या धीम्या गाड्या माटुंगा ते मुलुंड स्थानकांदरम्यान डाऊन जलद मार्गावर वळवल्या जातील. या गाड्या शीव, कुर्ला, घाटकोपर, विक्रोळी, भांडुप व मुलुंड स्थानकांदरम्यान थांबतील आणि नंतर या सेवा पुन्हा डाऊन जलद मार्गावर वळवण्यात येतील. ठाणे येथून सुटणाऱ्या अप धीम्या मार्गावरील सेवा मुलुंड येथे अप जलद मार्गावर वळवण्यात येईल. पुढे मुलुंड, भांडुप, विक्रोळी, घाटकोपर, कुर्ला आणि शीवदरम्यान मुलुंड व माटुंगा स्थानकांदरम्यान थांबून या सेवा धीम्या मार्गावर वळवण्यात येतील.
ट्रान्स हार्बर
कुठे : ठाणे ते वाशी, नेरूळ अप आणि डाऊन मार्गावर
कधी : सकाळी ११.१० ते सायंकाळी ४.१० वाजेपर्यंत
परिणाम : ब्लॉक कालावधीत ठाणे येथून वाशी, नेरूळ, पनवेलसाठी सुटणाऱ्या आणि वाशी, नेरूळ, पनवेल येथून ठाण्याकरिता सुटणाऱ्या अप मार्गावरील सेवा रद्द राहतील.