‘पीएनबी’ला आरोपी
करण्याची मागणी फेटाळली
मुंबई, ता. ३१ : गीतांजली समूहाशी संबंधित फसवणूक प्रकरणात पंजाब नॅशनल बँकेला (पीएनबी) आरोपी करण्याची मागणी करणारी याचिका उच्च न्यायालयाने नुकतीच फेटाळली. या प्रकरणातील आरोपी नितीन शाही यांनी दाखल केलेल्या याचिकेवर सुनावणी सुरू होती. संबंधित कथित फसवणूक ही काही बँक अधिकाऱ्यांनी गीतांजली समूहातील सदस्यांशी संगनमत करून पीएनबी बँकविरुद्ध केली होती. प्रत्यक्षात पीएनबी बँक स्वतः या कथित घोटाळ्याची पीडित आहे. त्यामुळे पीएनबीला आरोपी म्हणून समाविष्ट करता येणार नाही, असे निरीक्षण न्या. शिवकुमार डीघे यांच्या एकलपीठाने नोंदवले. तसेच न्यायालयाने शाही यांच्यावर १० हजारांचा दंडही ठोठावत ही रक्कम कायदेशीर सेवा प्राधिकरणाकडे जमा करण्याचे आदेश दिले.