मुंबईत ९, १० एप्रिलला पीव्हीसी शिखर परिषद

सकाळ वृत्तसेवा
मुंबई, ता. ३ ः भू-राजकीय तणाव, अस्थिर व्यापारप्रवाह, किमतीतील चढ-उतार आणि पुरवठा साखळीतील अडथळे यामुळे निर्माण झालेल्या अनिश्चिततेच्या पार्श्वभूमीवर, जागतिक पीव्हीसी उद्योग एका महत्त्वपूर्ण टप्प्यावर उभा असून या काळात ‘वायनल इंडिया २०२६’ ही जगातील सर्वात मोठी पीव्हीसी शिखर परिषद व प्रदर्शन ९ व १० एप्रिलला मुंबईत होत आहे.
यंदाची ही १३वी शिखर परिषद असून यामध्ये १,२०० पेक्षा अधिक प्रतिनिधी, ५३० पेक्षा अधिक संस्था आणि २०हून अधिक देश सहभागी होणार आहेत. पीव्हीसी क्षेत्रातील हे एक सर्वात प्रभावी व्यासपीठ ठरणार आहे. दोन दिवसांच्या या परिषदेत जागतिक स्तरावरील वक्ते सहभागी होणार असून विविध व्यावसायिक सत्रे व पॅनेल चर्चांमधून अनेक विषयांवर चर्चा होईल. पीव्हीसीचे भविष्यातील रोडमॅप, जागतिक व भारतीय आर्थिक परिदृश्य, शेती व जलसुविधांमधील मागणी, व्यापारावर भूराजकीय परिणाम, किंमत अस्थिरता व पुरवठा साखळी, शाश्वतता व वर्तुळाकार अर्थव्यवस्था, नवकल्पना व भविष्यातील नावीन्यपूर्णता तसेच रसायन उद्योगातील एआयचा प्रभाव या विषयांवर चर्चा झडणार आहे.
ही परिषद पीव्हीसी रेझिन उत्पादक, पाइप व प्रोफाइल उत्पादक, कन्व्हर्टर्स व कंपाउंडर्स, ॲडिटिव्हज व केमिकल कंपन्या, यंत्रसामग्री उत्पादक, तंत्रज्ञान पुरवठादार, व्यापारी आणि जागतिक ट्रेडर्स, संपूर्ण पीव्हीसी मूल्य साखळीतील घटकांना एकत्र आणणारे धोरणात्मक व्यासपीठ ठरेल. हे क्षेत्र सुमारे ३५,००० कोटी रुपयांचे असून २०३०पर्यंत ते जवळपास ५० हजार कोटींवर पोहोचण्याची अपेक्षा आहे.