येमेन नागरिकाच्या व्हिसाबाबत त्वरित निर्णय घेण्याचे आदेश

मुंबई, ता. ३ : मूळचा येमेन नागरिक असलेल्या आणि सध्या भारतात वास्तव्यास असलेल्या व्यक्तीच्या प्रलंबित व्हिसा मुदतवाढ अर्जावर त्वरित निर्णय घ्या, असे आदेश नुकतेच उच्च न्यायालयाने संबंधित अधिकाऱ्यांना दिले.
फहद रेडहवान अब्दुल्ला सईद असे त्या व्यक्तीचे नाव असून त्याची पत्नी हरजिंदर कौर यांनी दाखल केलेल्या याचिकेची नुकतीच न्या. सारंग कोतवाल आणि न्या. संदेश पाटील यांच्या खंडपीठासमोर सुनावणी झाली. नोव्हेंबर २०२३मध्ये विदेशी व्यक्ती १९४८ अधिनियमांतर्गत फहदच्या हालचालींवरील निर्बंधाचे आदेश लागू होते. सध्या त्यांच्यावर कोणतेही निर्बंध नाहीत; मात्र वैध कागदपत्रांशिवाय भारतातील त्यांचा मुक्काम हा वादाचा मुद्दा असल्याचे निरीक्षण न्यायालयाने नोंदवले. विशेष परिस्थितीत एखाद्या व्यक्तीला भारतीय परदेशी नागरिक (ओसीआय) म्हणून नोंदणी करण्यासाठी केंद्र सरकारकडे व्यापक अधिकार आहेत, असे न्यायालयाने नमूद केले. फहादचा भारतातील दीर्घकाळचा मुक्काम, भारतीय नागरिक असलेली पत्नी आणि दोन अल्पवयीन मुलांचा विचार करून अधिकाऱ्यांनी त्यांचा व्हिसा मुदतवाढ अर्ज त्वरित आणि शक्य असल्यास आठ आठवड्यांत निकाली काढावा, असे अंतरिम आदेशही खंडपीठाने दिले.