गोवंडीत बोगस डॉक्टरांची धरपकड

मुंबई, ता. ३ : वैद्यकीय परवाना, नोंदणी आणि परवानगी नसताना रुग्णालय, दवाखाने थाटून उपचारांच्या नावाखाली गरीब रुग्णांची फसवणूक करणाऱ्या गोवंडी येथील दोन बोगस डॉक्टरांना गुन्हे शाखेने बेड्या ठोकल्या. राजीव कपिलदेव रंजन आणि कुबेरनाथ यादव अशी त्यांची नावे आहेत. गुन्हे शाखेचे प्रभारी निरीक्षक भारत घोणे यांना या बोगस डॉक्टरांबाबत माहिती मिळाली होती. त्या आधारे महापालिकेच्या अधिकाऱ्यांसह घोणे आणि पथकाने गोवंडीच्या शिवाजीनगर येथील डॉ. के. डी. बन्सल क्लिनिक आणि नीलम कुबेर चिकित्सालय या दवाखान्यांवर गुरुवारी (ता. २) छापे घातले. चौकशीत या दोघांकडे वैद्यकीय परवाने, वैद्यकीय परिषदेकडील नोंदणी आणि महापालिकेची परवानगी नव्हती. दोन्ही दवाखान्यांमधून मोठ्या प्रमाणावर उपचार साहित्य जप्त करण्यात आले आहे.