उपमहापौरांनी घेतली अर्जेंटिनाच्या महापौरांची भेट

​मुंबई, ता. ४ : अर्जेंटिनातील ब्युनोस आयर्स प्रांतातील जोसे सी. पाझ येथील महापौर मारिओ अल्बर्टो इशी यांची उपमहापौर संजय घाडी यांनी शनिवारी (ता. ४) कुलाबा येथील हॉटेल ताजमध्ये सदिच्छा भेट घेतली. ​या भेटीदरम्यान महापालिकेच्या वतीने महापौर इशी यांचा विशेष सत्कार करण्यात आला. या भेटीत दोन्ही शहरांमधील प्रशासकीय कार्यपद्धती आणि नागरी विकासाच्या विविध पैलूंवर चर्चा करण्यात आली. ​उपमहापौर संजय घाडी यांनी मुंबई शहराचा सर्वांगीण विकास, महापालिकेचे विविध प्रकल्प आणि पायाभूत सुविधांबाबतची सविस्तर माहिती इशी यांना दिली. मुंबई शहराचा होणारा जलद विकास आणि येथील बदलती कार्यसंस्कृती पाहून इशी यांनी या विकासाचे कौतुक केले.​ दोन्ही शहरांमधील संबंध अधिक दृढ करण्याच्या उद्देशाने ही सदिच्छा भेट महत्त्वपूर्ण मानली जात आहे.
.............