डम्परच्या धडकेत दोन दुचाकीस्वार ठार

मुंबई, ता. १२ : पूर्व द्रुतगती मार्गावर विक्रोळी येथे रविवारी संध्याकाळी साडेपाचच्या सुमारास भरधाव डम्परने एका दुचाकीला धडक दिली. या धडकेत दुचाकीवरील दोन तरुण गंभीर जखमी झाले. त्यांना पोलिसांनी अन्य वाहनचालकांच्या मदतीने तत्काळ राजावाडी रुग्णालयात नेले; मात्र उपचारांपूर्वीच त्यांचा मृत्यू झाला होता. राम नारायण यादव आणि भीमाशंकर यादव अशी दोघांची नावे आहेत, अशी माहिती विक्राेळी पाेलिसांनी दिली. दोघेही साकीनाका येथे वास्तव्यास होते. डंपरचालकाविरोधात गुन्हा नोंदविण्यात आला आहे. अपघात झाला तेव्हा डम्परचालक मद्याच्या अमलाखाली होता का, याबाबत चाचणी केली जाणार आहे, असेही पोलिसांनी सांगितले.