डीजेविरोधातील कारवाईवरून रहिवाशांचे आंदोलन
वरळीत चक्का जाम

मुंबई, ता. १४ ः डॉ. बाबासाहेब आंबेडकर जयंतीनिमित्त वरळीच्या बीडीडी चाळीत डीजेविरोधातील पोलिस कारवाईमुळे नाराज रहिवाशांनी मंगळवारी संध्याकाळी तब्बल दोन तास आंदोलन केले. अखेरच्या टप्प्यात रहिवाशांनी चक्का जाम केला. रात्री नऊच्या सुमारास पोलिसांनी तात्पुरती परवानगी देत परिस्थितीवर नियंत्रण मिळवले.
डॉ. बाबासाहेब आंबेडकर जयंतीनिमित्त वरळीच्या जांबोरी मैदानात जत्रेचे, तर बीडीडी चाळीत मिरवणूक आणि विविध कार्यक्रमांचे आयोजन करण्यात आले होते. या वेळी डीजे लावण्यात आले होते; मात्र उच्च न्यायालयाच्या आदेशानुसार डीजेवर बंदी आहे. त्या पार्श्वभूमीवर वरळी पोलिसांनी आयोजकांना डीजे बंद करण्यास सांगितले. त्यावरून रहिवासी आणि पोलिसांमध्ये वाद झाला. पोलिसांच्या भूमिकेविरोधात रहिवासी रस्त्यावर आले. असंतोष दर्शविण्यासाठी रहिवाशांनी प्रथम बीडीडी चाळीतल्या इमारतींचा, जांबोरी मैदानातील जत्रेचा विद्युतपुरवठा बंद करीत काळोख केला. तरीही पोलिस भूमिकेवर ठाम असल्याचे लक्षात येताच रहिवासी रस्त्यावर उतरले. त्यांनी रस्त्यावर ठाण मांडत रास्ता रोको केला. पोलिस सातत्याने आंदोलक रहिवाशांची समजूत काढण्याचा प्रयत्न करीत होते. अखेर परिस्थिती आणखी चिघळण्याआधी पोलिसांनी तात्पुरती परवानगी दिली. त्यानंतर जमाव पांगला.