नियमावली धाब्यावर बसवून पुनर्विकासाची कामे
रवी राजा यांचा आरोप

सकाळ वृत्तसेवा
​मुंबई, ता. १६ ः मुंबई महापालिकेने बांधकामादरम्यान होणारे प्रदूषण रोखण्यासाठी कडक मार्गदर्शक तत्त्वे जाहीर केली असली, तरी प्रत्यक्षात मात्र विकसकांकडून या नियमांची सर्रास पायमल्ली होत आहे. वारंवार तक्रारी करूनही महापालिकेचे अधिकारी संबंधित विकसकांवर कारवाई करण्यास टाळाटाळ करीत असल्याचा आरोप भाजप मुंबईचे उपाध्यक्ष आणि माजी विरोधी पक्षनेते रवी राजा यांनी केला आहे.
​यासंदर्भात रवी राजा यांनी प्रशासनाकडे तीव्र संताप व्यक्त केला आहे. एफ उत्तर प्रशासकीय विभागाच्या अंतर्गत येणाऱ्या सायन परिसरात सुरू असलेल्या पुनर्विकासाच्या कामात सुरक्षेच्या आणि प्रदूषण नियंत्रणाच्या कोणत्याही नियमांचे पालन केले जात नाही. त्‍यामुळे परिसरात धुळीचे लोट उसळत असून रहिवाशांना श्वसनाचे गंभीर विकार जडत असल्‍याचे राजा यांनी सांगितले.