कॅबचालकांचे उपोषण स्थगित
मुंबई, ता. १५ : ॲप-आधारित कंपन्यांच्या मनमानी कारभाराच्या निषेधार्थ पुणे येथून तीन कॅबचालकांनी सुरू केलेली पदयात्रा १५ एप्रिल रोजी आझाद मैदान येथे पोहोचली. याबाबत परिवहन आयुक्त कार्यालयात बैठक बोलविण्यात आली होती. त्यावर परिवहन विभागाकडून उद्या कंपन्यांशी चर्चा करण्याचे आश्वासन देण्यात आल्याने कॅबचालकांनी गुरुवारचे उपोषण स्थगित केले आहे. परिवहन विभागाच्या आदेशांकडे दुर्लक्ष करून मनमानी दर आकारणे, वैध परवाना नसताना बाइक टॅक्सी सेवा चालवणे, पॅनिक बटनाच्या नावाखाली शुल्क वसूल करणे, कमिशनमध्ये पारदर्शकतेचा अभाव, अशा मुद्द्यांवर कॅबचालकांचे आंदोलन झाले होते.