वैद्यकीय परिषदेच्या निवडणुकीचा फेरविचार करावा

सकाळ वृत्तसेवा
मुंबई, ता. १७ : महाराष्ट्र वैद्यकीय परिषदेच्या निवडणुकीचा फेरविचार करावा, अशी मागणी असोसिएशन ऑफ मेडिकल ऑफिसर्स (एएमओ) यांनी केली आहे. राज्य सरकारच्या या निर्णयावर वैद्यकीय क्षेत्रातून तीव्र प्रतिक्रिया उमटत आहेत.
मंत्रिमंडळाच्या प्रस्तावानुसार, परिषदेवर निवडून येणाऱ्या सदस्यांऐवजी सरकारकडून नियुक्त सदस्यांची पद्धत लागू करण्याचा विचार आहे. यावर एएमओने आक्षेप घेत, यामुळे संस्थेची स्वायत्तता धोक्यात येईल आणि वैद्यकीय क्षेत्रातील लोकशाही प्रक्रिया कमी होईल, असे म्हटले आहे. एएमओच्या मते, निवडणूक पद्धतीऐवजी नियुक्ती पद्धत लागू केल्यास सामान्य डॉक्टरांचा आवाज दबला जाईल. तसेच सरकारी हस्तक्षेप वाढल्याने कौन्सिलच्या कामकाजातील पारदर्शकता आणि विश्वासार्हता कमी होण्याची भीती व्यक्त करण्यात आली आहे. यासंदर्भात आरोग्यमंत्री आणि संबंधित अधिकाऱ्यांकडे मागणी पाठवण्यात आली असून सरकारच्या भूमिकेकडे सर्वांचे लक्ष लागले आहे.