मुंबई सेंट्रल येथे आगीत १२ दुकान गाळे खाक

सकाळ वृत्तसेवा
​मुंबई, ता. १९ : मुंबई सेंट्रल परिसरातील डी. बी. मार्ग येथे शनिवारी रात्री उशिरा भीषण आग लागली. नवजीवन सोसायटीजवळील रिलायन्स मॉलसमोर असलेल्या सुमारे १२ दुकानांना या आगीने वेढले होते. या दुर्घटनेत कोणतीही जीवितहानी झाली नसल्याचे प्रशासनाकडून स्पष्ट करण्यात आले आहे.
आगीची तीव्रता जास्त असल्याने दुकानांमधील इलेक्ट्रिक वायरिंग, उपकरणे आणि फर्निचर खाक झाले. अग्निशमन दलाच्या जवानांनी अथक प्रयत्नांनंतर रविवारी पहाटे ३.५० वाजता ही आग पूर्णपणे विझवण्यात यश मिळवले. या भीषण आगीत एकूण १२ दुकानांमधील सामानाचे मोठ्या प्रमाणावर नुकसान झाले आहे. आगीचे नेमके कारण अद्याप समजू शकलेले नाही; मात्र शॉर्टसर्किटमुळे ही आग लागली असावी, असा प्राथमिक अंदाज वर्तवण्यात येत आहे.