‘त्या’ भूखंडाची प्रत्यक्ष पाहणी करा
तारापूरप्रकरणी उपाध्यक्ष अण्णा बनसोडे यांचे निर्देश

सकाळ वृत्तसेवा
मुंबई, ता. २१ : तारापूर औद्योगिक क्षेत्रातील घातक रासायनिक द्रव स्वरूपातील गैरप्रकाराबद्दल औद्योगिक भूखंडाची प्रत्यक्ष पाहणी करून सविस्तर अहवाल सादर करण्याचे निर्देश विधानसभा उपाध्यक्ष अण्णा बनसोडे यांनी दिले आहेत.
विधान भवनमध्ये तारापूर औद्योगिक क्षेत्रातील भूखंड क्र. ८ डी./१ येथे सडेकर इनव्हायरो इंजिनिअर्स प्रा. यांनी अवैध व बेकायदा घातक रासायनिक द्रव स्वरूपातील गैरप्रकारे विल्हेवाट लावल्याबाबत आयोजित बैठकीत ते बोलत होते.
औद्योगिक भूखंडाचा करार एमआयडीसीने २०१५ व २०२० मध्येच रद्द केला असतानाही कंपनीकडून बेकायदा काम सुरू असल्याचा आरोप करण्यात आला आहे. तसेच, उच्च रासायनिक घटक असलेले सांडपाणी थेट नाल्यात व समुद्रात सोडले जात असल्याचे समोर आल्याने या प्रकरणात सविस्तर माहिती घेण्याकरिता प्रत्यक्ष पाहणी करून अहवाल सादर करण्याचे निर्देश देण्यात आले आहेत.
..........