महाराष्ट्रात मराठी अनिवार्यच!
​मुंबई, ता. २३ : मध्य रेल्वेच्या भरती परीक्षेत (जीडीसीई) मराठीचा पर्याय उपलब्ध केल्यानंतर, महाराष्ट्रात मराठी भाषा अपरिहार्यच आहे. प्रशासनाने ही बाब कायम लक्षात ठेवावी, अशा शब्दांत मनसे नेते अमित ठाकरे यांनी रेल्वे प्रशासनाला ठणकावून सांगितले.
​रेल्वेच्या भरती प्रक्रियेतून मराठीला डावलण्यात आल्यानंतर मनसेने आक्रमक पवित्रा घेतला होता. या पाठपुराव्याला यश आल्यावर अमित ठाकरे म्हणाले, हा केवळ आमचा विजय नसून स्थानिक भूमिपुत्रांच्या हक्काचा आणि मराठी अस्मितेचा विजय आहे. प्रत्येक वेळी रस्त्यावर उतरल्यावरच प्रशासनाला जाग का येते, असा सवाल त्यांनी उपस्थित केला. प्रशासनाने स्वतःची जबाबदारी ओळखून मराठीचा समावेश आधीच करणे अपेक्षित आहे, असे ताशेरे त्यांनी ओढले.