मुद्रांक शुल्क विभागाचे काम सुरळीत
- द्वितीय श्रेणी अधिकारी कार्यरत, ऑनलाइनचा परिणाम

सकाळ वृत्तसेवा
मुंबई, ता. २४ : राज्य सरकारी कर्मचाऱ्यांनी आपल्या विविध मागण्यांसाठी मंगळवारपासून संप पुकारला असला तरी त्याचा मुंबई उपनगरातील मुद्रांक शुल्क कार्यालयाच्या कामावर कोणताही परिणाम झाला नसल्याचे चित्र आहे. वर्ग-२चे अधिकारी आणि जवळपास ५० टक्के इतर कर्मचारी कार्यरत असल्याने अद्याप खरेदी खत, नोंदणी प्रक्रिया सुरळीत सुरू आहे.
मुंबई उपनगरांत मुद्रांक शुल्क व नोंदणी विभागाची १४ कार्यालये आहेत. त्या प्रत्येक कार्यालयात एक द्वितीय श्रेणी अधिकाऱ्याशिवाय कनिष्ठ लिपिक, वरिष्ठ लिपिक आणि शिपाई असे ८९ कर्मचारी कार्यरत आहेत. दरम्यान, मंगळवारपासून सुरू झालेल्या संपात शिपाई, कनिष्ठ लिपिक आणि वरिष्ठ लिपिक असे ४८ कर्मचारी सहभागी झाले आहेत. मात्र उर्वरित कर्मचारी हजर आहेत. तसेच नोंदणीची बहुतांश कामे ऑनलाइन होत आहेत. त्यामुळे नागरिकांची कोणतीही गैरसोय होत नसल्याची माहिती उपजिल्हाधिकारी रमेश पगार यांनी दिली.