वडाळ्यात भीषण आग
वृद्ध जखमी; दोन व्यावसायिक गाळे खाक
सकाळ वृत्तसेवा
​मुंबई, ता. ४ : वडाळा (पूर्व) येथील संगमनगर भागात सोमवारी पहाटे एका व्यावसायिक गाळ्याला भीषण आग लागली. या आगीत ६५ वर्षीय एक वृद्ध व्यक्ती भाजला.
वडाळ्याच्या सॉल्ट पॅन रोडवरील एका इमारतीतील गाळ्याला पहाटे १.३४ वाजण्याच्या सुमारास आग लागली. या दुर्घटनेची माहिती मिळताच मुंबई अग्निशमन दलाच्या गाड्या तातडीने घटनास्थळी दाखल झाल्या. ही आग तळमजल्यावरील हेअर कटिंग सलून आणि त्याच्या मागील बाजूस असलेल्या गारमेंट कंपनीत पसरली होती.
​या आगीत सलूनमधील उपकरणे, खुर्च्या आणि गारमेंट कंपनीतील शिवणयंत्रे, कच्चा माल, कपड्यांचे रोल तसेच महत्त्वाचे दस्तऐवज खाक झाले. ​या दुर्घटनेत मोहम्मद उमर (६५) हे किरकोळ भाजले असून, त्यांना तातडीने शीव येथील लोकमान्य टिळक रुग्णालयात दाखल करण्यात आले आहे. आगीचे नेमके कारण अद्याप समजू शकले नसून, शॉर्टसर्किटमुळे आग लागली असावी, असा प्राथमिक अंदाज वर्तविण्यात येत आहे.