ठाणे-मुलुंडदरम्यान नवीन रेल्वे स्थानकाला मंजुरी
रेल्वेमंत्र्यांचे मुख्यमंत्र्यांना पत्र

सकाळ वृत्तसेवा
मुंबई, ता. ८ : ठाणे आणि मुलुंडदरम्यान नव्या उपनगरी रेल्वे स्थानकाच्या उभारणीला तत्त्वतः मान्यता देण्यात आली आहे. केंद्रीय रेल्वेमंत्री अश्विनी वैष्णव यांनी मुख्यमंत्री देवेंद्र फडणवीस यांना पत्र पाठवून याबाबत माहिती दिली आहे. मुख्यमंत्री फडणवीस यांच्यासोबत झालेल्या चर्चेच्या पार्श्वभूमीवर या प्रकल्पाला मंजुरी देण्यात आल्याचे पत्रात नमूद करण्यात आले आहे.
या प्रकल्पासाठी सुरुवातीला स्मार्ट सिटी योजनेअंतर्गत सुमारे १२० कोटी रुपयांची तरतूद करण्यात आली होती. मात्र, प्रकल्पाचा विस्तारित आराखडा आणि वाढलेल्या बांधकाम खर्चामुळे आता या स्थानकाची अंदाजित किंमत २४५ ते २५६ कोटी रुपयांपर्यंत पोहोचल्याचे समोर आले आहे. रेल्वे बोर्डाकडून आर्थिक तरतुदीस मान्यता मिळाल्यानंतर आता निविदा प्रक्रिया आणि पुढील प्रशासकीय हालचालींना वेग मिळण्याची शक्यता आहे. प्रस्तावित स्थानकात तीन प्लॅटफॉर्म, आधुनिक प्रवासी सुविधा, एस्कलेटर, लिफ्ट तसेच सॅटिस डेकची उभारणी करण्यात येणार असल्याची प्राथमिक माहिती आहे.
...
आनंद दिघेंच्या नावाची मागणी
ठाणे-मुलुंडदरम्यान नव्या उपनगरी रेल्वे स्थानकाचा प्रकल्प मार्गी लागण्यासाठी उपमुख्यमंत्री एकनाथ शिंदे, खासदार डॉ. श्रीकांत शिंदे आणि खासदार नरेश म्हस्के यांनी सातत्याने पाठपुरावा केला. या नव्या स्थानकाला ‘धर्मवीर आनंद दिघे’ यांचे नाव देण्याची मागणी खासदार नरेश म्हस्के यांनी केली असून, त्यास ठाणे महापालिकेनेही मंजुरी दिली आहे.