बाबा सिद्दीकी हत्या प्रकरण; सुरक्षेसाठी तैनात शिपाई बडतर्फ

मुंबई, ता. १० : राष्ट्रवादी काँग्रेसचे नेते बाबा सिद्दीकी यांची हत्या झाली तेव्हा त्यांच्या सुरक्षेसाठी तैनात करण्यात आलेल्या पोलिस शिपायास पोलिस दलातून बडतर्फ करण्यात आले. श्याम सोनवणे असे या शिपायाचे नाव आहे. सुरक्षा व संरक्षण विभागातर्फे सिद्दीकी यांना पुरवण्यात आलेल्या सुरक्षा ताफ्यात सोनवणे यांची नियुक्ती होती. ऑक्टोबर २०२४ मध्ये निर्मलनगर पोलिस ठाण्याच्या हद्दीत सिद्दीकी यांच्यावर गोळीबार झाला. त्यात त्यांचा मृत्यू झाला. या घटनेदरम्यान कर्तव्यात कसूर केल्याचा ठपका ठेवत सोनवणे यांना निलंबित करण्यात आले. त्यांचे वर्तन पाहता विभागीय चौकशीदरम्यान त्यांना बडतर्फ का करू नये, अशी विचारणा केली गेली. उत्तर समाधानकारक नसल्याने बडतर्फ करण्याचा निर्णय घेण्यात आला.