मराठी पाट्यांसाठी
११३ दुकानांना दणका

‘ए’ विभागात पालिकेची कारवाई

​सकाळ वृत्तसेवा
मुंबई, ता. १४ : मुंबईतील दुकाने आणि आस्थापनांवर मराठी भाषेत नामफलक लावण्याच्या नियमाची कडक अंमलबजावणी करण्यासाठी महापालिकेने कंबर कसली आहे. महापालिकेच्या ‘ए’ विभाग (फोर्ट, नरिमन पॉइंट, कुलाबा) कार्यक्षेत्रात आज राबवण्यात आलेल्या विशेष धडक मोहिमेत ११३ दुकानांवर कारवाई करण्यात आली. त्यांच्यावर महाराष्ट्र दुकाने व आस्थापना अधिनियमअंतर्गत गुन्हे दाखल करण्यात आले आहेत.
मुंबईचे उपमहापौर संजय घाडी यांनी या मोहिमेचा आढावा घेऊन प्रशासनाला नियमांचे उल्लंघन करणाऱ्यांवर कठोर कारवाई करण्याचे निर्देश दिले आहेत. आज केलेल्या पाहणी दौऱ्यादरम्यान असे दिसून आले की, ‘ए’ विभागातील बहुतांश व्यापाऱ्यांनी मराठी पाट्यांच्या नियमाचे स्वागत केले आहे. तपासणी केलेल्या ३,४५५ आस्थापनांपैकी ३,३४२ ठिकाणी मराठी नामफलक योग्यरितीने लावलेले आढळले, तर वारंवार सूचना देऊनही टाळाटाळ करणाऱ्या ११३ दुकानदारांवर प्रशासनाने कारवाई केली.