कुर्ल्यात प्रसूतीनंतर
महिलेचा मृत्यू
सकाळ वृत्तसेवा
मुंबई, ता. १४ : कुर्ला पश्चिम येथील भाभा रुग्णालय येथे प्रसूतीसाठी दाखल करण्यात आलेल्या २८ वर्षीय महिलेचा उपचारांदरम्यान मृत्यू झाल्याची धक्कादायक घटना उघडकीस आली आहे. सोनी हरीश यादव (वय २८) असे मृत महिलेचे नाव आहे. डॉक्टर आणि परिचारिकांच्या कथित हलगर्जीमुळेच महिलेचा मृत्यू झाल्याचा गंभीर आरोप नातेवाइकांनी केला आहे. या घटनेनंतर रुग्णालय परिसरात तणावाचे वातावरण निर्माण झाले हाेते.
कुर्ला पश्चिममधील हलाव पूल परिसरात राहणाऱ्या साेनी यांना साेमवारी (ता. १२) सकाळी १० वाजता भाभा रुग्णालयात दाखल करण्यात आले होते. त्यांची रात्री १० वाजता सिझेरियनद्वारे प्रसूती झाली. त्यांनी मुलाला जन्म दिला. बुधवारी (ता. १३) दुपारी २.३०च्या सुमारास सोनी यांनी छातीत तीव्र दुखत असल्याची तक्रार रुग्णालय कर्मचाऱ्यांकडे केली हाेती. त्यानंतर प्रकृती आणखी बिघडून त्यांचा मृत्यू झाला. दरम्यान, महिलेचा मृतदेह जे. जे. रुग्णालय येथे शवविच्छेदनासाठी पाठविण्यात आला आहे. पोलिस आणि आरोग्य विभागाकडून या प्रकरणाचा तपास सुरू आहे.