आयटीआय प्रवेश नाेंदणी २१ मेपासून
दहावीच्या गुणपत्रिका वितरित झाल्यानंतर वेळापत्रक

मुंबई, ता. १५ : व्यवसाय शिक्षण व प्रशिक्षण संचालनाच्या अंतर्गत येणाऱ्या राज्यातील औद्योगिक प्रशिक्षण संस्था आयटीआयमधील विविध ट्रेडच्या प्रवेशासाठी ऑनलाइन प्रवेश प्रक्रिया व त्याची नोंदणी प्रक्रिया २१ मेपासून सुरू केली जाणार आहे. या दिवशी विद्यार्थ्यांना ऑनलाइन अर्ज करून आपले प्रवेश शुल्क भरता येतील.

विद्यार्थ्यांना या प्रवेशासाठीचे शुल्क भरल्यानंतर त्यांना या प्रवेशासाठी विकल्प प्राधान्यक्रम भरता येईल. राज्यातील सर्व शैक्षणिक मंडळाकडून त्या त्या शाळांना दहावीच्या विद्यार्थ्यांच्या गुणपत्रिकेचे वितरण झाल्यानंतर या आयटीआय प्रवेशासाठी नव्याने सुधारित वेळापत्रक जाहीर केले जाणार असल्याचे आज संचालनांकडून जाहीर करण्यात आले. राज्यात एकूण एक हजारहून अधिक खासगी आणि शासकीय आयटीआय आहेत. यामध्ये यंदाच्या शैक्षणिक वर्षांमध्ये एक लाख ५७ हजार ६६६ प्रवेशाची मर्यादा आहे.
--
मुंबईत अशा आहेत जागा
मुंबई विभागात शासकीय ६७ आयटीआयमध्ये एकूण १५,१९२ तर खासगीच्या ३९ आयटीआयमध्ये १,४१२ अशा एकूण १०६ आयटीआयमध्ये २०,७०४ जागा उपलब्ध आहेत. मागील वर्षी संचालनाकडून नीट नियोजन न झाल्याने मुंबई आणि परिसरातील आयटीआयमध्ये प्रचंड जागा रिक्त राहिल्या होत्या, तर विभागाचे दुर्लक्ष झाल्याने मागील वर्षी राज्यभरात प्रवेश कमी होण्यासाठी मोठा फटका पडला होता.