लग्नाच्या भूलथापा देऊन
परदेशी तरुणाची फसवणूक

मुंबई, ता. २२ ः मुंबईत एका तरुणासोबत ‘लिव्ह इन’मध्ये असताना निव्वळ आर्थिक फसवणुकीसाठी ब्रिटन येथील भारतीय वंशाच्या तरुणासोबत लग्नाच्या तयारीत असलेल्या महिलेविरोधात डी. एन. नगर पोलिसांनी गुन्हा नोंदवला. तक्रारदार तरुणाच्या दाव्यानुसार अवघ्या काही दिवसात या महिलेने १६ लाख रुपये उकळले.
ब्रिटनमध्ये स्थायिक तक्रारदार तरुणाचा अलीकडेच घटस्फोट झाला होता. तो नव्या जोडीदाराच्या शोधात होता. संकेतस्थळावर आरोपी महिलेचे प्रोफाइल पाहून ते प्रभावित झाला. प्रोफाईलमध्ये तिनेही घटस्फोटीत असल्याचे नमूद केले होते. दोघांनी चर्चा केली आणि लग्न करण्याचा निर्णय घेतला. निवडक नातेवाईक, मित्रांच्या उपस्थितीत ब्रिटनमध्ये साखरपुडा आटोपला. त्यापूर्वी व्हिसा, तिकिटांसाठी महिलेने तरुणांकडून पैसे घेतले होते, महागड्या भेटवस्तूही घेतल्या होत्या.
काही दिवसानंतर दोघांकडून लग्नाची तयारी सुरू झाली; मात्र दिवसेंदिवस महिलेकडून विविध कारणांसाठी पैसे मागण्याचे प्रमाण वाढले होते. त्यामुळे संशय आलेल्या तरुणाने महिलेची चौकशी सुरू केली. योगायोगाने तिच्या मित्र-परिवारातील एक व्यक्ती तरुणाच्या परिचयाचा निघाला. या महिलेने अशाप्रकारे अनेकांना फसवल्याचे आणि मुंबईत ती एका तरुणासोबत लिव्ह इन रिलेशनमध्ये असल्याची माहिती या व्यक्तीकडून प्राप्त होताच तरुणाने तक्रार दिल्याचे पोलिसांनी सांगितले.