दूध अन् प्रवास उद्यापासून महागणार
सकाळ वृत्तसेवा
मुंबई, ता. २१ : सध्या महागाईने सर्वसामान्यांना बराच मोठा दणका दिला आहे. साखरेसोबत स्वयंपाकघरातील रोजच्या गरजेच्या वस्तूंवर याचा परिणाम झाल्याचे दिसून येत आहे. त्यातच आता १ सप्टेंबरपासून म्हशीचे सुटे दूध नऊ रुपयांनी तर रिक्षा-टॅक्सी प्रवास अनुक्रमे एक आणि दोन रुपयांनी महागणार आहे.
दुधाळ जनावरांच्या वाढत्या किमती तसेच पशुखाद्याच्या दरात झालेल्या वाढीच्या पार्श्वभूमीवर मुंबई दुग्ध उत्पादक संघाने दुधाच्या घाऊक दरात वाढ करण्याचा निर्णय घेतला आहे. त्यानुसार दुधाचा सध्याचा घाऊक दर प्रतिलिटर ९३ रुपयांवरून १०२ रुपये करण्यात येणार आहे. मुंबईत हे नवे दर १ सप्टेंबर २०२६ ते २८ फेब्रुवारी २०२७ या कालावधीत लागू राहणार आहेत. मुंबई महानगर प्रदेश परिवहन प्राधिकरणाने (एमएमआरटीए) इंधनाच्या वाढत्या किमती व वाढलेल्या परिचालन खर्चाचा विचार करून किमान भाड्यात वाढ मंजूर केली आहे. त्यामुळे मुंबईकरांचा प्रवास महागणार आहे. नव्या दरानुसार रिक्षाचे किमान भाडे २६ रुपयांवरून २७ रुपये, तर काळी-पिवळी टॅक्सीचे किमान भाडे ३१ रुपयांवरून ३३ रुपये होणार आहे. हे दोन्ही दर पहिल्या १.५ किलोमीटर अंतरासाठी लागू असतील.