नाहूरमध्ये उभारणार अत्याधुनिक व्यायामशाळा

सकाळ वृत्तसेवा
​मुंबई, ता. ३१ : मुलुंडच्या नाहूर भागात स्थानिक नागरिकांच्या सोयीसाठी आणि आरोग्याच्या दृष्टीने महापालिकेकडून ‘पीसीओ चौकी आणि अत्याधुनिक व्यायामशाळा’ उभारण्यात येणार आहे. नाहूर येथील महापालिकेच्या आरक्षित भूखंडावर ही तळमजला अधिक तीन मजली इमारत साकारली जाणार आहे.
​या संपूर्ण प्रकल्पासाठी महापालिकेच्या वतीने तीन कोटी ८० लाख २८ हजार ३९५ रुपये इतक्या कंत्राट रकमेच्या प्रस्तावाला स्थायी समितीच्या मंजुरीसाठी शिफारस करण्यात आली आहे. ​नगर उपअभियंता (इमारत बांधकाम) पूर्व उपनगरे विभागामार्फत हे काम पूर्ण केले जाणार आहे. महापालिका वास्तुविशारदांनी तयार केलेल्या आराखड्यानुसार एकूण २०६.८६ चौरस मीटर जागेवर ४६०.२२ चौ.मी. बांधकाम केले जाईल. ​तळमजला व स्टिल्ट येथे मीटर रूम, पंप रूम आणि पार्किंगची सोय असेल. ​पहिला मजल्यावर स्टोअर रूम, भांडारगृह एक ते चार, तर दुसऱ्या मजल्यावर कार्यालयीन जागा आणि महिला व पुरुषांसाठी चेंजिंग रूम,​ तिसऱ्या मजल्यावर अत्याधुनिक साहित्य आणि दोन मिमी जाडीच्या रबर मॅटसह व्यायामशाळा असणार आहे. ​महापालिकेने या कामासाठी हल्को इन्फ्राप्रोजेक्टस् यांची निविदा मंजूर करण्याची शिफारस केली आहे. ​या प्रकल्पाची एकूण सविस्तर अंदाजपत्रकीय किंमत ४,६१,८८,९०७ इतकी आहे. कामाचा करारनामा झाल्यापासून पावसाळ्यासह १८ महिन्यांच्या कालावधीत हे काम पूर्ण करण्याचे बंधन कंत्राटदारावर असणार आहे.