धावत्या एक्स्प्रेसमध्ये दिवा पेटवून पूजा
रेल्वे प्रवाशावर कारवाई

सकाळ वृत्तसेवा
मुंबई, ता. १ : धावत्या एक्स्प्रेसच्या आरक्षित बर्थवर दिवा पेटवून पूजा करणे एका प्रवाशाला चांगलेच महागात पडले. डब्यात खुली ज्वाळा पेटवल्याने आग लागण्याचा धोका निर्माण झाल्याचे लक्षात येताच मध्य रेल्वेने संबंधित प्रवाशावर कारवाई केली. त्याला भुसावळ स्थानकात उतरवून त्याच्याकडील पूजेचे साहित्य जप्त करण्यात आले.
ट्रेन क्रमांक १२७८२ हजरत निझामुद्दीन-म्हैसूर एक्स्प्रेसच्या ए-१ डब्यात सोमवारी (ता. ३१) हा प्रकार घडला. प्रवाशाला भुसावळ स्थानकात उतरवण्यात आले. चौकशीत संबंधित प्रवासी ५५ वर्षांचा असून ग्वाल्हेरचा असल्याचे स्पष्ट झाले. रेल्वे कायद्याअंतर्गत मंगळवारी (ता. १) कारवाई करण्यात आली. आवश्यक प्रक्रिया पूर्ण करून भारतीय न्याय संहितेतील कलमानुसार नोटीस देऊन प्रवाशाची सुटका करण्यात आली. रेल्वे कायद्यानुसार अशा प्रकारात दंडासह कारावासाची तरतूद आहे. कलम १५३ अंतर्गत दोषीला पाच वर्षांपर्यंत कारावास होऊ शकतो, असा इशारा मध्य रेल्वेने दिला. डब्यात दिवा, मेणबत्ती, अगरबत्ती किंवा अन्य ज्वलनशील वस्तू पेटवू नये. अशा प्रकारांमुळे आग लागून मोठी दुर्घटना होण्याची शक्यता असल्याने प्रवाशांनी रेल्वेच्या सुरक्षा नियमांचे पालन करावे, असे आवाहन मध्य रेल्वेने केले.