महालक्ष्मी रेसकोर्सवर १० झाडांचा बळी?
ताडदेव पोलिसांत गुन्हा दाखल

सकाळ वृत्तसेवा
​मुंबई, ता. ३ : महालक्ष्मी रेसकोर्स येथील नामांकित मेसर्स रॉयल वेस्टर्न इंडिया टर्फ क्लब लिमिटेड प्रशासनाकडून नियम धाब्यावर बसवून वृक्षतोड करण्यात आल्याचा धक्कादायक प्रकार समोर आला आहे. महापालिकेची पूर्वसूचना न देता आणि परवानगीतील अटी-शर्तींचा भंग करून १० झाडे गायब केल्याप्रकरणी टर्फ क्लबचे अध्यक्ष आणि सचिवांविरोधात ताडदेव पोलिस ठाण्यात अदखलपात्र गुन्हा दाखल करण्यात आला आहे.
महापालिकेच्या जी साउथ वॉर्डातील कनिष्ठ झाड अधिकारी संतोष भेट्टी यांनी ताडदेव पोलिस ठाण्यात ही तक्रार नोंदवली आहे. महापालिकेने टर्फ क्लबला दिलेल्या परवानगीनुसार,​ १३ झाडे कापण्यास परवानगी होती, तर ​१२ झाडे दुसऱ्या ठिकाणी पुनर्रोपित करायची होती आणि ​४३ झाडे आहे त्याच जागेवर सुरक्षित ठेवणे बंधनकारक होते; ​मात्र ११ ऑगस्टला बीएमसी अधिकाऱ्यांनी घटनास्थळाची पाहणी केली असता, आहे त्या जागेवर सुरक्षित ठेवायच्या ४३ झाडांपैकी आठ झाडे आणि पुनर्रोपणास परवानगी दिलेल्यांपैकी दोन झाडे (एकूण १० झाडे) त्या ठिकाणी आढळूनच आली नाहीत. कोणतीही माहिती न देता झाडांची कत्तल करण्यात आल्याचे पाहणीत उघड झाले. महापालिकेने १४ ऑगस्टला टर्फ क्लबला कारणे दाखवा नोटीस बजावून स्पष्टीकरण मागितले होते. ​महापालिकेच्या तक्रारीवरून ताडदेव पोलिसांनी गुन्हा नोंदवला असून अधिक तपास सुरू आहे.