राष्ट्रीय शहरी आरोग्य अभियानातील १,२०० कर्मचारी बेमुदत संपावर
सकाळ वृत्तसेवा
मुंबई, ता. ४ : राष्ट्रीय शहरी आरोग्य अभियानांतर्गत मुंबई महापालिकेच्या आरोग्य विभागात कार्यरत सुमारे १,२०० कंत्राटी कर्मचाऱ्यांनी विविध मागण्यांसाठी आझाद मैदानात गेल्या पाच दिवसांपासून बेमुदत आंदोलन सुरू केले आहे. १० वर्षांपासून सेवा बजावूनही सेवेत समावेशन, वेतनवाढ आणि अन्य कर्मचारी सुविधांपासून वंचित असल्याचा आरोप आंदोलनकर्त्यांनी केला आहे.
या अभियानांतर्गत वैद्यकीय अधिकारी, परिचारिका, सहाय्यक परिचारिका, प्रयोगशाळा तंत्रज्ञ, औषधनिर्माते, माहिती नोंदणी कर्मचारी, समाज कार्यकर्ते आणि परिचर अशा विविध पदांवर कर्मचारी कार्यरत आहेत. बहुतांश कर्मचारी २०१६ पासून सेवा देत असून, कोरोना महामारीच्या काळातही त्यांनी काम केले. दरम्यान, १० वर्षे पूर्ण होऊनही त्यांना महापालिका सेवेत समाविष्ट करण्यात आलेले नाही, असे पालिका दवाखान्याचे डेटा एंट्री ऑपरेटर प्रवीण चव्हाण यांनी सांगितले.
कर्मचाऱ्यांच्या म्हणण्यानुसार, अनेकांना १८ ते २० हजार रुपयांच्या आसपास वेतन मिळते. गेल्या अनेक वर्षांत वेतनवाढ झालेली नाही. महिला कर्मचाऱ्यांना भरपगारी प्रसूती रजा मिळत नसून, बोनस आणि नियमानुसार सुट्ट्याही मिळत नसल्याची तक्रार आहे. कायमस्वरूपी व कंत्राटी कर्मचाऱ्यांमधील भेदभावामुळे मानसिक त्रासाला सामोरे जावे लागत असल्याचेही गिरीश सुर्वे यांनी सांगितले.
कंत्राटदाराकडून नोकरीवर रुजू होताना काही कर्मचाऱ्यांकडून पाच हजार रुपये घेतले जात असल्याचा तसेच प्रसूती रजेच्या काळातही पैसे घेतल्याचा गंभीर आरोप कर्मचाऱ्यांनी केला आहे. या प्रकरणाची चौकशी करण्याची मागणीही त्यांनी केली आहे.
आंदोलनाचा परिणाम मुंबईतील आरोग्यसेवेवर झाला आहे. गेल्या पाच दिवसांपासून बाह्यरुग्ण विभाग, बालकांचे लसीकरण, मलेरिया व डेंग्यू तपासणी, एचआयव्ही चाचण्या, कुटुंब नियोजन सेवा, संसर्गजन्य आजारांवरील काम तसेच गर्भवती महिलांची नोंदणी आणि आरोग्यविषयक संगणकीय नोंदींचे काम प्रभावित झाल्याचा दावा कर्मचाऱ्यांनी केला आहे.